SAVONA Claodin Do Giabbe

 Da-i microföni de Radio Sann-a Sound 104 ve diggö: A-a  compagnia chi n'abbe n'abbe o ve salûa o Claodin Do Giabbe.

Ciao gente ancheu o l'è Materdì  17 de Marsö  2026,  San Patriziö Vescö, vigila de-a Festa Patrönâle de Sann-a, festa de l'appariziön.

E sci... e poi doppo quarche breve istante de silenziö ö continöava  cön ö sêu parlâ in te quella lengoa che a l'è ö dialettö ligöre e ö ne cöntâva de seiann-e di lûmetti, e ne dixeva de quande da tûtte e fenestre, tûtti i barcöin de varie cöntrae çittadinn-e gh'ean i lûmetti pe' a Madonna… 

E chi i me regordi se mescian ai Sêu. Sci, perchè quelle giornae de Marsö ean giornae particölari in te a nostra câ: intantö l'ean due giornae de festa, infaeti allöa o 19 de Marsö a l'ea a festa de S. Giuxeppe lavoratö,  Festa di Pöpâ, e quindi ö nö se andava a schêua. Ma gh'ea dell'atro che poi ve cöntio. 

Andaemmö pè ördine: ö 17 de Marsö se giuttâva a momâ a mettì i ballönetti in sce-ö barcön, e doppo çenn-a se sciortiva pè andà in giö pe-e stradde de Sann-a a miâ i barcöin tûtti illuminae, ö paiva che fösse 'na gâra a chi g'avesse i lumetti ciù cölörae, quarche d'ûn illuminou de lûxe elettrica, ma molti ancön con in lumin drentö, con a sciamma che a mandâva 'na lûxe traballante e che de votte ö piggiava fêugö pe' i dispetti da tramontann-a che a furia de fâli cinciâ ö finiva pe' mette a sciamma a cöntattö cön ö papè dö ballönettö...

Me regordo a mae maaveggia quande, passandö da via Paleocapa, da vexin a-ö palazzö di pavoin, gh'ea sempre 'na luminaia grossa comme o palasso che cön 'na cadenna de luxi a disegnava 'na grande M, scimbölö de a Madönna de l'appaixiön.

E poi, ö giornö döppö, se andava a-o Santöaio da Madonna, a pe', e ad ogni cappelletta l'ea 'na sosta, pe' dì 'na preghea e pe' miâ tûtte e sciöe che l'addöbbavan. E arrivae in te-a ciassa, gh'ea a banda che a sêunnâva e i banchetti cön i dösci... e naturalmente a gexa cön e porte spalanchae e drentö pin de gente che a pregava e a cantava...

Ma nön l'ea finia chi, o 19 l'ea, l'emö zà ditö,  S. Giuxeppe lavoratö,  Festa di Pöpâ. Ma in tâ mae câ a l'ea due votte a festa do pöpâ, perchè mae pöe ö l'ea naetö proprio ö 19 de Marsö dö 1931. Se ö fösse ancön cön noâtri, ne faieva 95.

L'è pè questö che quest'annö ve scrivö pe' ûn regallö che ho faetö a lè, ma anche a vuatri: quellö de metti in sce ö sitö do Claodin e versioin "epub" di doi libbri che pöei descaregâ liberamente pe' leze tûtte e votte che vöei, in sce ö computer o in sce ö tablet, in te ö reader... Restan cömönque e verscioin online pe' quelli che veuggian lezilö senza descaregarlö.

Poei cliccâ qui pe andâ in te a pagina pe' piggiâ "A cansön da nostra taera", mentre poei  cliccâ qui pe andâ in te a pagina pe' piggiâ "Aödö de bön". Troviei 'na immagine de 'na "e" de sbiecö e facendo click in sce s'immagine ö libbrö ö vegnâ scaregöu in sce ö computer.

Quarche d'ûn ö me ciamia cömme mai i anni primma nö aiva mai regördöu ö sêu cömpleannö. In veitae nön me ö sön mai scordou de mae pöe, ma quest'annö ö l'è ûn annö particölare. A lûggiö ricörran i vint'anni da che ö Claodin ö se n'è andaetö, quindi questo ö l'è sölö ö primmö di regalli che mi ghe veuggiö fâ st'annö a regördö dö Claodin. 

Quindi se sentiemö ancön.

Grazie ancön a tûtti quelli che me scrivan pe' email, e grazie a-e vostre parolle, ai regordi e a-e emoxioin che voei condividde con mi. E a proposcito de email, ve regordo che o nêuvo indirizzö da-ö quae ve scrivo: claodin@claodin.org, ö se azzöntö a-ö vegio indirizzo claodin@tiscali.it che ö resta sempre a disposixiön.

Ve regordö invexe che ö vegiö indirizzö de-ö sito fsweb.interfree.it ö l'è in dismissiön, quindi se l'ei sarvou in sce ö voströ computer dovei cangià ö segnalibbrö cön http://www.claodin.org o http://www.claodin.it.  

Ben amixi, concludemmö questö löngo messaggiö cön ö regordö dö Claodin de a festa de l'appariziön. Ve salûo e ve mandö i mae augûri pe' 'na bönna festa e... augûri a tûtti i pöpâ.

Te veûggio ben pöpâ.
Francesco Scaglia

                   E seiann-e de l'apparizion 

                                    de Claodin Do Giabbe

Quanti anni son passae da quandö l'ea figgêu, ma me-e regordo ben quelle seiann-e ch'andâvan da-ö 17 a-ö 19 de marsö; ean e seiann-e de l'apparizion, ma pe nûatri figgêu ean e seiann-e di ballönetti. E sci, a quelli tempi la in te schêue e in te famigge non insegnavan de segûo l'edûcazion sessuale e i figgêu nasceivan ûn po' dappertûtto: nasceivan sötto ai coi, drento a'n cöstö d'insalatta, sottö a'n fönzo e anche, perchè no?, drento a'n ballönettö. E mi, tanti anni fa', in t'ûnn-a nêutte tra ö 18 e o 19 de marzö son naetö drento a'n ballönettö, a me gh'ava trovou mae moae primma de l'arboi dö 19 de marsö andando appönto a levâ i ballönetti da-ö barcon. Vûatri nön ghe crediei de segûo, ma mi invece gh'ho credûo pe' tanto tempo e, chissà perchè, in çerti mömenti me piaxe creddighe ancön oua. A tradizion di ballönetti a se n'andaeta anche le cömme tûtte e nostre belle tradizioin, ma, tanti anni fa', primma da-a goera... L'ean appenn-a passae e çenie che za in te bitteghe donde se vendeiva papae favan bella möstra averti e serrae, i ballönetti. Scinn-a a l'epoca da goera d'Africa ean sölö riöndi, a forma de balon, rosci o giâni; e poi gh'ean i lûmetti che ean di tocchi de papae a forma de gotto che e nostre moae mettivan in sce-a finestra impindö ö föndö de sabbia e sendendöghe drento ûn morchetto. Maniman, passandö i anni, i ballönetti aivan cangiou forma e cölöre, ghe n'ea a forma de lûnn-a, a-a venexiann-a, a-a pecchineise e, con i lûmetti, ornâvan tûtte e fenestre apponto in te quelle seiann-e de l'apparizion. Tûtta-a gente de Sann-a, natûralmente, quelle seie a l'ea in giö a vedde a lûminazion e anche mi gh'andâva, ma mi andâva a vedde i ballönetti smorti, perchè conosceiva ö segretö: in te quelli ballönetti gh'ean di figgêu appenn-a naeti, mi ou saveiva ma non ou diva a nisciûn.

Poi o l'ea scciûppâ a goera, e i ballönetti e i lûmetti non s'ean ciû appeisi o posae in sce-e fenestre. Gh'ea l'oscûramento e pe' çinque anni e ûniche lûxi che se poreivan vedde ean quelle de batterie, di bengala, de bombe, di incendi e così via.

Ma, finalmente, doppo çinque anni a goera a l'ea finia, gh'ean e macerie sci ma cian cianin a vitta a ritornâva e-e nostre tradizioin vegnivan repiggiae.

Nasceivan nêuve ca a-ö posto de macerie, ma, poi, cominsâvan a spontâ anche dovve 'na votta gh'ean i orti con cösti de coi e d'insalatta, dapertûttö, chi e la, spöntavan palassi, se cominsâva anche a disboscâ, e dönde a lezze o nön ou permettiva, o se ghe dâva fêugo e a-ö pöstö di fonzi, stradde e palassi. Stradde, palassi, macchine, e-e nostre tradiziöin? Bönn-a nêutte!

Mi, in te sta nêutte de l'apparizion, sölö, settou in ta coxinn-a de ca mae, miandö a vegia Madoninn-a cön ö Botta in adorazion, Madoninn-a de gessö de mae besava, cön o seu lûmettö co manda lûxe verde tremolante, me domando: donde nascian i figgêu d'anchêu? Drento a de macchine? Tra mûggi de prie, moin e çimentö? In meso a l'asfalto...?

EBOOK GRATUITO

"A cansön da nostra taera" è stato pubblicato in proprio da Claodin Do Giabbe e Pino de l'Angin nel 1978.
Non cercatelo nelle librerie, forse in qualche banchetto dei libri usati...

Data la rarità ho deciso di ripubblicare le opere di Claodin contenute in questo libro in formato ebook, per permettervi di sfogliare le pagine e rileggere le sue poesie.

Da oggi potete scaricare liberamente il libro in formato epub cliccando qui per poterlo scaricare e leggere comodamente sul vostro computer, tablet o reader senza dover sfogliare le pagine da internet, anche senza una connessione attiva. Se avete un Kindle, è stato testato il processo di conversione disponibile su Amazon che garantisce un'ottima resa anche su questi dispositivi.